O Furancho A da Canteira atópase no concello de Poio, unha localidade que combina a tranquilidade rural coa proximidade á cidade de Pontevedra.

Poio é un municipio con moita historia e recunchos curiosos. Unha das súas particularidades é que nel atópase o Mosteiro de San Xoán de Poio, un impresionante conxunto monástico fundado na Idade Media. O curioso deste lugar é que alberga unha das bibliotecas máis importantes de Galicia e un mosaico xigante do Camiño de Santiago, de máis de 200 metros cadrados, que representa todas as rutas xacobeas europeas.

Neste mesmo concello atópase Combarro, que ten a maior concentración de hórreos de Galicia á beira do mar. A súa orixe non está do todo clara, pero crese que a maioría foron construídos entre os séculos XVIII e XIX. Esta pequena vila é tamén un exemplo da arquitectura mariñeira tradicional, coas súas casas de pedra pegadas á auga.

Ademais, Poio ten unha conexión especial co mundo da arte, xa que aquí naceu Colmeiro, un dos grandes pintores galegos do século XX.

Para chegar ao furancho A da Canteira hai que tomar a estrada que une Poio con Combarro. Xusto antes de chegar ao Hotel Combarro, cómpre xirar á dereita en dirección á Capela da Renda pola rúa Casalvito, seguindo o camiño cara a O Pereiro. Desde aí, continúase pola rúa Pereiro de Abaixo ata chegar a Pereiro de Arriba. Subindo, deixaremos á nosa esquerda o furancho Tizón e máis arriba o furancho A de Caballero, ao pasar este último, teremos á esquerda o Camiño Esperón, polo que chegaremos ao noso destino.

Este furancho non dispón de estacionamento e só conta con sitio para uns poucos coches. Ademais, o camiño de acceso é bastante estreito, polo que recomendamos buscar aparcamento antes e camiñar ata el.

A diferenza doutros furanchos con décadas de tradición, A da Canteira abriu en 2024, e iso reflíctese no seu ambiente. O espazo está coidado ata o último detalle, con mesas e cadeiras novas, unha decoración pensada e un ambiente limpo e ordenado. Un dos aspectos que o diferencia é a atención posta nas instalacións. Cando vas ao baño neste furancho, decátaste de que están noutro nivel.

Viños

Neste furancho pódense atopar viños do país, tanto branco como tinto, ademais de opcións como Albariño e Catalán, o que dá marxe para escoller segundo ó gusto de cada comensal.

Tapas

A carta inclúe opcións variadas con racións xenerosas, ideais para compartir:

• Empanada de millo
• Empanadillas
• Tortilla
• Zorza
• Raxo
• Orella
• Ovos
• Táboa de embutidos

As racións son abundantes, o que permite gozar dunha comida completa acompañada do viño caseiro.

O Furancho A da Canteira é unha opción interesante para quen busca un lugar con bo ambiente, detalles coidados e unha carta variada, sen perder a esencia tradicional dos furanchos galegos.