Xa dentro, atopamos un lugar dunha soa estancia cunha ducia de mesas e unha pequena barra para os que queiran ir soamentes a tomar un viño. Trátase dun sitio acolledor e realmente bonito. Paredes orixinais de pedra, teito alto coas antigas vigas de madeira á vista, contras nas fiestras e apeiros de labranza recordando a orixe do lugar.

Se chegas a primeira hora é un sitio tremendamente agradable e tranquilo. Pero esa tranquilidade, como na maioría dos sitios, convértese en algarada a medida que van chegando os comensais e vanse enchendo as mesas.

Temos que dicir que aquí comemos probablemente un dos millores churrascos de tódolos sitios nos que estivemos. Pedímolo mixto, con porco e tenreira, e ambos estaban de sobresaínte. Póñencho sobre unha fonte de barro nun braseiro para que se manteña quente e poidas darlle o punto que máis che guste á carne. Se teñen sempre este nivel de carnes xa hai un bo motivo para achegarse a este lugar.

Quizais, como bos furancheiros que somos, faltounos un viño da casa. A súa carta de viños creemos que é mellorable. Como contrapartida, se pides un chupito póñenche unha botelliña pra que sirvas o que che pete. Xa nos coñecemos e sabemos que cos chupitos sempre acabamos repetindo.

Pra nós A Cova da Santa é un sitio pra recomendar.