O furancho A Casa do Currante está ubicado en Marín. Para chegar dende Marín, debe tomarse a estrada nacional PO-551 que pasa pola Escola Naval en dirección a Bueu. Debe seguirse por esta estrada durante varios quilómetros até chegar á Praia da Cova. Alí, atópase un desvío á dereita que indica a dirección a “A Teoira”. Ao tomar este camiño, chegará á rúa Moledo, onde deberá continuar sen desviarse até chegar ao furancho.

Cabe destacar que este establecemento non dispón de aparcadoiro propio, polo que debe buscarse un lugar onde aparcar nas inmediacións. Aínda que os camiños poden ser estreitos, non é moi difícil atopar un sitio onde aparcar.

O propietario do furancho comenta que este abre tódolos anos para San Xosé (19 de marzo). O sitio non é moi grande, conta cun pequeno comedor para os días de mal tempo, así como con mesas ao aire libre distribuídas baixo unhas parras e unha gran mesa de pedra xunto á cociña. Esta última chama a atención xa que atópase á vista do usuario. Alí, dispón dunha prancha e unhas freidoras para elaborar as tapas que se serven.

O ambiente en A Casa do Currante é moi familiar e tranquilo. Serven uns viños xenerosos en carolino, tanto branco como tinto. O primeiro é suave e fácil de beber, mentres que o segundo é un pouco máis áspero. En canto ás tapas, pódense degustar zorza, raxo, orella, chourizo, empanadillas e empanada de choco, bacallau ou carne.