A Taberna de Antes

Por Furancheiro
A Taberna de Antes

A Taberna de Antes está situada en Magarella, no concello de Vilaboa.

Chégase dende Vigo pola saída da Ponte de Rande en sentido Morrazo. Na primeira rotonda collemos a derradeira saída en sentido Cobres/Vilaboa pola estrada N-554. Dende aquí é todo recto ata chegar a Cobres. Alí xiramos polo desvío a altura da igrexa de Santa Cristina de Cobres, cruzamos a autoestrada polo paso elevado e xiramos á esquerda en sentido a Magarella. Dende aquí está moi ben indicado e non ten perda.

Este sitio dispón dun amplo aparcadoiro pra moitos coches. Cando cuzas a porta toca subir unha costa ben pronunciada, xa que a zona de terraza queda na parte alta da finca. Ten unha zona exterior con numerosas mesas de pedra e madeira, ben debaixo de parras ou de árbores. Tamén dispón de mesas nun vello alpendre no que vos podedes resgardar tanto os días de sol coma os de choiva.

Comedor principal A Taberna de Antes

Xa no interior, o sitio é sencillamente marabilloso. Paredes de pedra, teitos altos en madeira, trebellos nas paredes, cheminea de leña, ... fan deste sitio un lugar realmente vistoso e agradable.

A Taberna de Antes préstase a unha comida caseira, de racións abundantes e prezos razoables, e así é. Ten unha carta con productos da zona onde podes comer tapas, algo de marisco ou peixe e carnes á brasa. Sorprendeunos moi gratamente o viño branco Albariño da casa. Un viño realmente bo que merece a pena que probedes.

Vilaboa é unha zona moi furancheira, pero na tempada na que os furanchos están pechados A Taberna De Antes é unha moi boa opción para comer ben e a bo prezo.

Compartir:

Comentarios sobre A Taberna de Antes
Sé o primeiro en comentar algo deste recuncho
Enviar un comentario