O furancho Os Cabalos está situado no camiño do Quintal. Chégase dende a nacional N-550 que une Redondela con Porriño, a medio camiño entre ambas á altura de O Enxertado. Unha vez que deixamos a estrada e collemos o camiño cara Quintal, pasamos unha ponte por debaixo das vías do tren e a uns 100 metros á dereita está o furancho. Pódese aparcar no camiño porque na finca non ten espazo dabondo pra moitos coches.

Dende fora non se aprecia o grande que é, pero en canto entras daste conta de que o furancho ocupa toda a planta baixa da casa. Debe ter ó redor dunha ducia de mesas amplas con moito espazo pra comer. Pódese reservar mesa se chamas antes con antelación.

Recomendamos ir cedo porque nas horas punta está bastante cheo e non é doado atopar sitio.

Tanto o branco coma o tinto son de boa calidade e cun prezo de 1 euro a taza. Pra comer serven empanadillas de bacallao, carne ou calamares na súa tinta, tortilla, raxo con patacas e pementos, calamares, empanada… As racións son moi xenerosas e caseiras. Con unha ración e dous viños comen dúas persoas.

Dous viños, unha empanadilla de calamares na súa tinta e unha ración de raxo 11,50 euros. Cóbranche o pan a 1 euro.